Австриецот Доминик Тим, кој има само 32 години, а на крајот на минатата сезона реши да стави крај на кариерата и беше шампион на Отвореното првенство на САД во 2020 година, призна дека тенисот е спорт за богатите.
Во интервју за „Џот Даун Спорт“ тој откри дека кога имате од 13 до 18 години, мора да плаќате помеѓу 80.000 и 100.000 евра годишно ако сакате да се пробиете кон врвот, значи околу 1 милион евра вкупно, што е неверојатна сума пари која речиси никој не може да си ја дозволи.
„Тенисот е за богатите, тренинзите се многу скапи. Кога имаш 15 или 16 години и почнуваш да играш на јуниорските гранслемови, патуваш речиси како професионалец: 30 или 35 недели годишно. И нема награден фонд, па само трошиш. Кога почнав да се искачувам на ранг-листата и да заработувам пари, не ме интересираше како функционираат парите или што да правам со нив. Само сакав да бидам финансиски сигурен на крајот од мојата кариера“, објасни тој во интервјуто. „Имав голема среќа што имав одличен финансиски советник на 18 или 19 години кому му верував од првиот ден. Тој се грижеше за сè“, додава Тим.
И додава:
„Објавените бројки на заработка изгледаат огромни, но чек од, да речеме, 65.000 фунти на Вимблдон, лесно губите 60%: прво даноци во земјата каде што играте, потоа во вашата, плус трошоците за тренери, физиотерапевти, патување и опрема. Дури и со спонзори, мора да плаќате даноци врз основа на деновите што ги поминувате во земји како Обединетото Кралство или САД бидејќи вашата слика се појавува на телевизија со нивната облека или лого“.
Тој зборуваше и за некои од неговите главни ривали во кариерата, како што е Рафа Надал.
„Ако си противник на Рафа во финалето во Париз, тие не ти олеснуваат. Водителот почнува да ги набројува неговите титули: 2005, 2006, 2007… и публиката полудува. Ти си таму и слушаш и веќе се чувствуваш како да си го изгубил натпреварот. Тоа е едно од најлошите искуства што сум ги имал во мојата кариера“, рече Тим.
