Синоќа се одиграа четири натпревари во англиската Премиер лига, по кои се комплетира првата полусезона. Сите екипи имаат одиграно по 19 од планираните 38 кола.
Интересно е дека првиот ден од 2026 година донесе многу неефикасен фудбал. На четирите натпревари кои се одиграа беа постигнати само два гола, а немаше победник на ниедна средба. Кристал палас и Фулам ремизираа 1:1, додека без голови завршија останатите три средби: Ливерпул – Лидс, Брентфорд – Тотенхем и Сандерленд – Манчестер сити.
Ова е првпат по 29 април 1998 година во еден ден да се одиграат барем четири натпревари, а вкупно да бидат постигнати само два гола. Исто така ова е првпат по 11 април 2010 година кога во еден ден се играат четири средби, три да завршат со резултат 0:0. Едноставно многу неефикасно започна Новата година во англиската Премиер лига.
