Победата на Тотенхем против Манчестер Сити ја врати драмата во трката за титулата во Премиер лигата, но тоа беше и доказ дека Граѓаните не се толку доминантни. Тотенхем имаше три порази во низа пред гостувањето на „Етихад“, а избраниците на Антонио Конте одиграа најдобро на теренот на шампионот и на крајот победија со 3:2.
Погодокот што Хари Кејн го даде за триумф од 3:2 беше постигнат во 94:25 минута и тоа е најдоцниот победнички гол постигнат против Сити уште од септември 2009 година, кога Мајкл Овен погоди за Манчестер јунајтед во 95:27 минута.
Со овој триумф, Тотенхем комплетираше дабл против Сити во првенството, откако и во есенскиот дел, лондонскиот тим победи, но тогаш беше 1:0. Тотенхем е само четвртата екипа која успеала да ги освои сите шест бода во Премиер лигата против Манчестер сити предводен од Пеп Гвардиола.
Претходно тоа им успеало само уште на Челзи во сезоната 2016/17, Манчестер јунајтед (2019/20) и Вулверхемптон (2019/20).
