Манчестер сити никако не може да му даде гол на Тотенхем во Лондон, а ако таа традиција продолжи и вечерва, Граѓаните најверојатно да останат без титула во Премиер лигата.
По првото полувреме на дуелот на Тотенхем и Сити е 0-0, резултат на кој најмногу се радува Арсенал бидејќи ако остане вака, Топчиите би биле лидери на табелата на едно коло до крајот со ист број бодови со Сити, но би имале и за три гола подобра гол-разлика од актуелниот првак во трката за титулата.
Сити губеше на претходните четири премиерлигашки гостувања на новиот стадион на Тотенхем, и не само тоа, туку тимот на Пеп Гвардиола нема ни дадено гол на овој терен во Премиер лигата. Зимоска Граѓаните постигнаа гол на стадионот на Тотенхем и победија со 1-0, но тоа беше меч од ФА купот.
Интересна е ситуацијата на трибините. Навивачите на Тотенхем од една страна посакуваат победа над големиот ривал и доближување до местата кои водат во Лигата на шампионите, но со триумф над Сити, нивниот најомразен ривал Арсенал ќе биде блиску до титула, а не го сакаат тоа.
Кај фановите на Арсенал нема дилеми, тие вечерва 100 процентно се за најлутиот ривал Тотенхем и му посакуваат победа или барем реми.
