Раководството на Тотенхем се одлучи да му обезбеди средства на Маурисио Покетино да доведе засилувања во јануарскиот преоден рок. Приоритет е да се засили офанзивната линија, а прва цел на аргентинскиот стратег е Џенгиз Ундер, фудбалерот на Рома.
Откако „петлите“ останаа без аквизиција во текот на летото, за отворањето на зимскиот фудбалски пазар ќе имаат доволно средства да донесат квалитетно засилување.
Италијанските медиуми пренесуваат дека една понуда за Ундер веќе била одбиена од страна на Рома, а Тотенхем сега е подготвен да издвои 46 милиони фунти за турскиот репрезентативец. За неговите услуги има интерес и од Баерн Минхен, „баварците“ сметаат дека токму Ундер може да биде вистинскиот наследник на Арјен Робен, земајќи предвид дека игра на истата позиција.
Дваесет и едногодишниот крилен напаѓач сезонава настапи вкупно на 17 натпревари во Серија А и во Лигата на шампионите, реализирајќи четири погодоци (по два во двете натпреварувања), како и пет асистенции.
