Главна вест од НБА лигата е изненадувалката размена на играчи помеѓу Лос Анџелес лејкерс и Далас маверикс, со која Словенецот Лука Дончиќ преоѓа кај Езерџиите, додека во Далас се сели Ентони Дејвис. Во НБА ретко кога среде сезона се разменуваат ѕвезди од ваков калибар, особено ако тие не бараат да си одат од некој клуб.
Маверикс бил клубот кој го направил првиот чекор во овие преговори откако процесот на продолжување на договорот и добивање на максималма плата не напредувал како што очекувале. Дончиќ не барал да си замине, но бил информиран за намерата на неговиот тим во саботата.
Во Лејкерс, Лука нема да има максимален договор, но ќе игра во ист тим со Леброн Џејмс, кој е при крај со кариерата и после неговото пензионирање, Дончиќ ќе стане лидер на најпопуларниот тим во НБА.
Езерџиите ноќеска го победија Њујорк во „Медисон сквер гарден“, Џејмс направи трипл-дабл, и после мечот било дадено зелено светло за реализација на трампата. Џејмс во минатото има изјавувано дека Дончиќ му е омилен играч. Инаку, Дончиќ има играно со сегашниот тренер на Лејкерс, Џеј Џеј Редик.
Во Далас имале сомнежи околу честите повреди на Лука и неговата слаба одбрана, па затоа решиле да се ослободат од него и да донесат играч кој ќе им ја зацврсти одбраната за да имаат некаква шанса за титула.
