Финансиската полиција на Италија започна истрага за трансферот на Виктор Осимен од Лил во Наполи, за кого беа платени 71,2 милиони евра. Трансферот се случи во 2020 година, но спорна е високата цена на трансферот ако се знае дека Осимен во Лил помина само една сезона и постигна 18 гола.
Споменатата сума е намалена за 20 милиони евра бидејќи во цената беа вклучени и четворица фудбалери кои од Наполи се преселија во Лил. Се работи за малку познатите играчи Клаудио Манци, Луиџи Лигури, Чиро Палмиери и Орестис Карнецис. Спорни се проценетите цени на овие фудбалери како дел од трансферот.
Манци, Лигури и Палмиери никогаш не заиграа за Лил, туку беа испратени на позајмица во Фермана, а потоа беа пуштени да си заминат како слободни играчи. Во Лил единствено остана грчкиот интернационалец Карнецис, кој има само три настапи за втората екипа на Французите. Клаудио Манци во моментов е дел од Турис, додека Лигури настапува за Леко. Двата клуба се дел од италијанската Серија Ц, односно третолигашката конкуренција. Палмиери е дел од Ночерина, која се натпреварува во Серија Д, четвртиот ранг на италијанскиот фудбал.
