Македонскиот фудбалски репрезентативец Елиф Елмас започна со тренинзи со својот нов клуб РБ Лајпциг иако има мала повреда на мускул во бутот.
Елмас со својот нов тим е на подготовки во Шпанија и не ја симнуваше насмевката од лицето, а и тренерот Марко Розе е задоволен што на располагање ќе го има Дијамантот од Скопје.
„Со Елиф ја пополнивме празнината на позициите кои останаа празни по двете заминувања на Форсберг и Карваљо. Нашиот ростер не е широк, но полн е со квалитет. Елмас е сестран, флексибилен играч. Тој може да игра поназад, во средниот ред, како офанзивен играч во средина и на двете крилни позиции. Тој има одлична техника, а исто така се враќа назад и помага во одбрана“, изјави Розе.
