Првото полуфинале на Отвореното првенство на Австралија меѓу Новак Ѓоковиќ и Јаник Синер ќе започне во 4.30 часот наутро по средноевропско време, а тренерот на италијанскиот тенисер, Симоне Вањоци, изјави дека неговиот пулен го очекува неверојатно тежок предизвик против најдобриот тенисер на сите времиња.
Вањоци смета дека Новак е специјален тенисер и истакна дека неговиот тенисер ќе даде сè од себе.
„Новак е специјален. На сите им е јасно дека тука му се допаѓаат условите за игра и не сметајќи го Париз, каде што често налетуваше на монструмот наречен Рафа, на секој терен покажуваше колку е голем. Нема голема разлика да се игра против Новак тука во Мелбурн или во Њујорк и на Вимблдон. Дуелот против Новак е еден од најтешките предизвици во тенисот. Затоа сме среќни што не се наоѓаме во оваа позиција и што Јаник одлично го одигра првиот дел од турнирот. Полуфиналето ќе му претставува одлично искуство“, изјав Вањоци.
Ова ќе биде второ полуфинале за Синер на гранслем-турнир, првпат играше на Вимблдон, каде што загуби токму од Ѓоковиќ.
„Разликата во однос на тој дуел е дека тогаш првпат играше полуфинале, а сега има многу поголема самодоверба поради одличните резултати кои ги оствари во последните неколку месеци. Мислам дека сега повеќе ќе верува во победа против најдобриот тенисер на сите времиња“, додаде Вањоци.
