Најмалку тројца македонски репрезентативци ќе бидат дел од наредната фаза во фудбалската Лига на Европа. На едно коло до крајот на првата фаза по групи, пласман меѓу оние 32 екипи што напролет ќе се борат за трофејот обезбедија и тимовите на Елиф Елмас (Фенербахче), Стефан Ристовски (Спортинг Лисабон) и Аријан Адеми (Динамо Загреб). Адеми и Елмас, поточно нивните тимови, синоќа одиграа 0-0, резултат кој им одговараше на двата тима.
Понатаму може да оди и Бобан Николов, кој е член на МОЛ Види, а ќе испадне АЕК Ларнака на Иван Тричковски и Даниел Мојсов, но двајцата нашинци беа меѓу позабележителните играчи. Тричковски, кој е капитен на кипарскиот тим, синоќа со својот гол му донесе победа на АЕК на гостувањето во Швајцарија кај Цирих.
Ристовски е повреден и не настапи синоќа, но Спортинг со убедлив триумф си го запечати местото во следната фаза.
„Европска пролет“ ќе дочека и Арсенал, чиј трети голман е Дени Илиев, но Македонецот уште нема дебитирано во ова натпреварување.
