Вардар нема да игра во финалето на Супер Глоуб купот откако попладнево загуби од Кил со 30:34. Актуелниот европски првак одигра лошо второ полувреме и во една таква ситуација не можеше да се очекува победа против германскиот ривал.
„Црни“ беа 10-тина минути во второто полувреме за Вардар. Кил имаше водство од 22:20 во 36-тата минута, а потоа следуваше победничката низа за Германците. Голманот Николас Ландин го „маѓепса“ голот на противникот, Вардарци утнаа два пенали и пет-шест зицер-позиции, а Кил тоа знаеше да го казни. Со серија од 7:0, во 45-тата минута стигна до недостижна предност од 29:20. Потоа погоди Дибиров за да ја прекине серијата на пртивникот, но тоа беше предоцна.
Кил водеше од почетокот на дуелот, а Вардар само во еден дел од првото полувреме одигра во посакуваниот ритам. Црвено-црните имаа водство од 14:11, но тоа кратко траеше. Кил со серија од 6:1 повторно го врати водството и на полувремето водеше со 19:17, предност која беше само зголемена до крајот на мечот.
Чупиќ, Дибиров и Шишкарев со по пет погодоци беа најефикасни во составот на Вардар. За играч на мечот сосема заслужено беше избран голманот на Кил, Ландин.
