Кошаркарската репрезентација на Турција ја запиша и втората победа во групата А на Европското првенство, откако во возбудлив натпревар во Рига успеа да ја совлада селекцијата на Чешка со 92-78.
Иако многумина очекуваа лесен дуел по слабото издание на Чесите против Португалија, мечот започна со изненадувачка доминација на ривалот. Чешка рано поведе со осум поени разлика, па селекторот Ергин Атаман мораше да повика тајм-аут уште во првата четвртина.
Првиот период заврши со предност за Чешка (27-21), но Турција одговори во вториот период, предводена од фантастичниот Алперен Шенгун, кој на крајот мечот го заврши со 23 поени и 12 скокови.
Со поддршка и од Чеди Осман (21 поен) и Беркан Османи (16 поени), Турција постепено ја презеде контролата и на полувреме замина со предност од +7. Чесите не се предаваа и со прецизен шут од дистанца го држеа приклучокот, но Турците одговараа преку своите носители на играта и не дозволија пресврт.
Во последната четвртина Чешка се обиде со брзи тројки да ја врати неизвесноста, но Турција веднаш одговори и ја обезбеди втората победа во групата. Најефикасен кај Чесите беше Петрка со 23 поени.
Германија без многу мака ја совлада Шведска со 105-83. Актуелниот светски шампион дојде до победата предводен од Денис Шредер, кој постигна 23 поени и Франц Вагнер со 21 поен, а двоцифрен ефект имаа и Маоду Ло и Даниел Тајс. Кај Шведска, најдобар беше Панцар со 18 поени.
