Градското дерби во Лондон припадна на Челзи со конечни 2-0 на гостувањето кај Тотенхем. Жозе Мурињо го загуби и вториот меч против некога поранешна екипа, по гостувањето на „Олд трафорд“, сега и Челзи го разочара португалскиот стратег.
Бодовите за екипата на Френк Лампард ги донесе двојниот стрелец Вилијан. Бразилецот на двапати ја затресе мрежата на Газанига во првиот дел, што беше доволно за Мурињо да го претрпи првиот пораз на домашен терен како предводник на Петлите.
Иако се очекуваше поголен притисок на домаќините во вторите 45 минути во обид да се вратат резултатски, следуваше ладен туш по еден час игра. Сон заработи директен црвен картон за непромислениот потег, па така Тотенхем ги загуби сите шанси да се избори за добар резултат на оваа средба.
Челзи сега има 32 бода и стои на четвртото место, шест повеќе од Тотенхем кој падна на седмата позиција и остана со 26 бода по 18 натпревари во Премиер лигата.
