Фудбалската репрезентација на Украина може да жали што не победи против Германија на пријателскиот меч одигран во Бремен. Средбата беше од пријателски карактер, а на крајот заврши 3:3.
Германија, која беше голем фаворит пред почетокот, поведе со голот на Фулкруг во шестата минута, но за кратко време се случи пресврт. Циганков израмни во 19-тата минута, а Рудигер си даде автогол, па на полувреме беше 2:1 за Украина.
Добрата игра на гостите продолжи и на почетокот од вториот дел. Циганков со својот втор погодок зголеми на 3:1, резултат кој беше актуелен до 10 минути пред крајот. Панцерите во финишот заиграа многу поквалитетно и со два гола се спасија од пораз. Најпрво Кај Хаверц намали на 2:3, а во 90+1 минута Џошуа Кимих израмни на 3:3.
Украина е следен противник на Македонија во квалификациите за Европското првенство кое следната година ќе се игра во Германија. Дуелот меѓу нашата селекција и Украина е на 16 јуни, на арената „Тодор Проески“ во Скопје.
