Умит Каран се покажа како одлично решение за позицијата шеф на стручниот штаб и успеа да го разбуди Шкупи од кризата и од дното на табелата да го искачи на петтото место по првиот дел од сезоната.
Турската фудбалска легенда играше за гигантот Галатасарај, а Шкупи му е првиот клуб каде што е главен тренер и успешно ја почна мисијата.
Тој ги предводеше чаирчани од клупата на 10 меча и има биланс од 5 победи, три нерешени и два порази, што е добар ефект за почеток.
„Кога дојдов, клубот беше во резултатска криза, но имаше и други проблеми. Се обидов да ја вратам атмосферата, тренинзите да бидат пријатни, но и ефектни. Немаме голем фонд на играчи, но затоа Шкупи има одлични млади фудбалери на кои им дадовме простор за докажување. За мене најважно е секој играч да се бори до максимум, да го остави срцето на терен. Мислам дека стигнавме до степен до кој би можеле да бидеме задоволни. Сега останува да се засилиме и да продолжиме во добар ритам и во вториот дел од првенството“, вели Каран за клупската интернет-страница на Шкупи.
Тој најави дека клубот ќе организира зимски подготовки во Анталија, ги пофали навивачите на Шкупи и очекува уште подобри резултати на чаирчани во пролетниот дел од шампионатот.
