Управата на Унион Берлин испиша историја во Бундеслигата откако по разделбата со тренерот Урс Фишер, во новиот стручен штаб именува и жена.
Досегашниот тренер на екипата на Унион Берлин до 19 години, Марк Гроте, е назначен за привремен тренер на првиот тим, а тој се одлучи помошник да му биде 32-годишната Мари-Луис Ета.
Иако за сите германски медиуми овој потег претставува пријатно изненадување, за Унион Берлин ова е сосема логичен потег бидејќи Гроте и Ета заедно ја водат екипата до 19 години.
Мари-Луис Ета претходно има работено и како помошник-тренер во младите германски репрезентации.
Таа е поранешна фудбалерка на Хамбургер, Клопенбург и Вердер, а со репрезентацијата на Германија до 20 години стана светска шампионка во 2010 година.
Тандемот Гроте и Ета дебито на клупата на Унион Берлин ќе го имаат на 25 ноември, во дуелот против Аугсбург.
