Германскиот бундеслигаш Унион Берлин започнува еден необичен потфат откако одлучи да го зголеми капацитетот на нивниот стадион „Ан дер Алтен Форстереи“. Воопшто не е чудно што еден клуб сака да го зголеми капацитетот на стадионот на којшто игра, но уникатноста е во тоа што Унион Берлин сака тоа зголемување да биде речиси за 100 отсто.
Моментално стадионот на Унион Берлин може да прими 22.012 гледачи, а со новиот план капацитетот треба да достигне бројка од 40.000 места. Уникатноста на овој стадион е тоа што најголем дел од местата се за стоење. На постоечкиот капацитет има само 3.617 места за седење, а дури 18.395 се за стоење.
Според планот за новото зголемување на капацитетот, бројот на места за седење ќе биде 8.500, а останатите 31.500 места ќе бидат за стоење. Со тоа овој стадион е еден од водечките во Европа на којшто има места наменети за стоење.
| Union Berlin propose new stadium with 40,000 capacity! ️
It plans to have the largest standing capacity in Germany and also state-of-the-art training pitches/facilties. pic.twitter.com/4YjqQxkDjJ
— EuroFoot (@eurofootcom) October 3, 2024
Од Унион Берлин побараа кофинансирање за изградба на стадионот, и тоа од страна на навивачите, на кои им се нуди сопствеништво, и тоа по цена од 500 евра по акција, со напомена дека еден навивач може да купи максимум 10 акции. Со овој потег, Унион Берлин сака да се осигури дека стадионот ќе биде во сопственост на навивачите, кои ќе добијат и свој удел во сопственичкиот дел од клубот.
Сезонава на мечевите на Унион Берлин капацитетот на стадионот секогаш е исполнет до последно место, а овој клуб може да се пофали дека има и одлична женска екипа на чии мечеви во просек доаѓаа по 5.500 гледачи. Моментно бројот на членови навивачи на Унион Берлин е околу 70.000.
