Роџер Федерер вечерва во Лондон ќе го одигра својот последен натпревар во богатата тениска кариера. Швајцарската легенда во тандем со Рафаел Надал ќе играат против Френсис Тијафо и Џек Сок на Лејвер купот.
Роџер и Рафа ќе ја бранат честа на европскиот тенис, но овој меч, кој ќе почне по 21.30 часот, ќе биде многу повеќе од тоа.
Се повлекува човекот кој има 20 гренслем-титули, 103 освоени турнири и мина 310 недели на првото место на АТП-листата. Ова ќе биде последен турнир на кој заедно ќе бидат тројцата најдобри и најтрофејни во историјата на тенисот, кои одбележаа една ера која тешко ќе се повтори.
