Тажни вести пристигнуваат од Чиле. Почина италијанскиот 25-годишен скијач Матео Франзосо, кој доживеа тежок пад на тренинг.
Падот беше многу сериозен, Италијанецот остана неподвижен, а веднаш пристигна хеликоптер и тој беше префрлен во блиската болница.
Веднаш беше ставен во вештачка кома, но недолго потоа пристигна веста која многумина ги растажи. Италијанскиот скијач ја загуби најважната трка, животната, и им подлегна на тешките повреди.
Веднаш се огласи Скијачката федерација на Италија.
„Ова е голема трагедија за нашето семејство и нашиот спорт. Немаме зборови за сè што се случи, искрено сочувство до семејството на Матео“, соопштија од федерацијата и додадоа:
„Мораме да направиме сè што е во наша моќ за вакви трагедии повеќе да не се повторуваат на патеката.“
Матео Франзосо е роден во Џенова на 16 септември 1999 година и утре требаше да го прослави својот 26-ти роденден.
Целата Италија е во шок, бидејќи Франзосо беше еден од кандидатите за настап на Зимските олимписки игри во Кортина и Милано 2026 година. Спустот и супер-џи-слаломот беа негови специјалности, а во февруари оваа година освои и поени во супер-џи во Кранс Монтана.
