Тениската ранг-листа на АТП што важи од денеска е една од најчудните во историјата на еден од најпопуларните индивидуални спортови.
Водечкото трио, Данил Медведев, Новак Ѓоковиќ и Александер Зверев, има многу проблеми, а сите се со своја чудна приказна.
Данил Медведев ја почнува втората седмица во кариерата како најдоброрангиран светски тенисер, но е под тивки санкции од АТП бидејќи е Русин и покрај неговото име и презиме нема никакви обележја.
Стои само името и презимето и дека е прв со 8.615 поени. Ова е по малку и трагикомично и Медведев е казнет само затоа што е од Русија, иако тој самиот се спротивстави на воената интервенција во Украина со пораки и со објави на социјалните мрежи.
Уште потрагични се најавите од АТП дека на руските тенисери нема да им биде дозволен настап на тениските турнири, а тоа веројатно ги чека и тенисерките од Русија на ВТА-турнирите.
Во таков случај, Медведев ќе го загуби првото место, а зад него е Новак Ѓоковиќ, кој исто така е под чудни санкции бидејќи е невакциниран, па не може да игра во одредени земји, пред сè во САД.
Новак има 8.465 поени и е блиску до преземање на првото место, односно враќање на врвот ако му дозволет да игра без вакцина.
Зад нив е Германецот Александер Зверев, кој неодамна направи голем инцидент со судијата на турнирот во Акапулко.
И тој е под притисок, а и за него се бара строга казна да не игра од 3-6 месеци.
Најтрофејниот гренслем-шампион, Рафаел Надал, кој има 21 титула е на четвртото место, а во Топ-5 е и Гркот Стефанос Циципас.
