Барселона и Интер како клубови со многу трофеи и навивачи го играат најголемото дерби на вечерта во Лигата на шампионите, а и тренерите на двата тима се свесни за значењето на средбата и водат своевидна психолошка војна во пресрет на битката на „Камп ноу“.
Барселона се спаси од пораз во Дортмунд, но сега игра дома, каде што се чувствува многу покомотно. Најголемиот проблем на Каталонците е дали и колку ќе може да игра Лионел Меси. Иако нема дадено гол сезонава, самото присуство на најдобриот фудбалер на светот е значајно за Барса и внесува страв кај противниците.
Тренерот Ернесто Валверде вели дека до пред самиот почеток на мечот нема да се знае дали Меси ќе биде стартер.
„Дембеле одработи само половина тренинг, Меси малку повеќе. Нема да ризикуваме со него, во следните часови ќе се знае дали ќе можам да сметам на него“, рече Валверде, кој е без услугите на Алба, Умтити и младата сензација Фати.
Тренерот на Интер, Антонио Конте, исто така тактизира со составот. Во нападот нема да биде Ромелу Лукаку, кој би го зачувал за дуелот со Јувентус кој е за неколку дена, па стартер ќе биде Алексис Санчес, кој е поранешен играч на Барселона и добро ги познава условите на „Камп ноу“.
Со Луис Суарес и Меси на едната, а Лаутаро Мартинес и Алексис Санчес на другата страна страна, фановите најмногу голови очекуваат од овие јужноамерикански напаѓачи.
