Тренерите на најлутите ривали во Шпанија, Барселона и Реал Мадрид може да бидат задоволни и со освоениот бод во меѓусебниот дуел, иако посакуваа полн плен. И на Ернесто Валверде и на Зинедин Зидан резултатот од 0-0 им донесе рекорди со кои може да се фалат.
Валверде се изедначи со Пеп Гвардиола како единствени тренери на Барселона кои на седум меча по ред немале пораз од Реал.
Зидан е првиот тренер на Реал кој останал непоразен на своите први пет гостувања на „Камп ноу“. Зидан има две победи и три ремија како тренер на Реал на гостувањата кај Барса. Тој може да биде задоволен и што не примија гол (Барселона даваше гол на претходните 23 соочувања со Реал) и станаа првиот тим по Хетафе од февруари 2018 наваму кој извади 0-0 на гости кај Барса.
