Откако Вирџил ван Дајк дојде во Ливерпул на почетокот на 2018 година, овој тим стана најдобар во дефанзивата во Англија. Ниту еден клуб нема повеќе мечеви во кои успеал да не прими гол. Тој успех, Ливерпул многу му го должи токму на Ван Дајк.
Столбот на одбраната на Ливерпул неодамна откри како пред неколку години за малку се спасил од смртта. Немилиот настан се случил во 2012 година, додека играше за Гронинген. Дефанзивецот почувствувал болки во стомакот и со мајка му заминал во болница. Лекарите го прегледале и му рекле дека нема ништо, па затоа и го пуштиле да си оди дома.
Сепак, болките станале посилни, па Вирџил морал да замине во друга болница. Таму констатирале дека имал запаление на слепо црево и инфекција на бубрезите. Веднаш бил пратен на операција, а рехабилитацијата траела два месеца.
„Уште се сеќавам на тоа време кога лежев во болницата. Сè што можев да видам, беа тие цевчиња над мене. Целото тело ме болеше и не можев никако да си помогнам. Во тие моменти размислував за најлошото сценарио. Животот ми беше во опасност, можев да умрам“, открива Ван Дајк.
Холанѓанецот не само што успеа да закрепне по таа операција, туку сега е и еден од најдобрите дефанзивци во светот.
