Ракометната Федерација на Македонија ги одреди казните по инцидентите и хаосот што го приредија навивачите за време на големото дерби меѓу Вардар и Еурофарм Пелистер кое се играше во СЦ „Јане Сандански“.
Натпреварот беше во прекин 20-тина минути откако навивачите на Е. Пелистер веднаш по влегувањето во салата запалија факели и чадни бомби, кои ги фрлија на теренот и на трибините, по што домашните навивачи Комити влетаа на теренот со цел да дојдат до трибината на која беа гостинските фанови.
Откако и двата тима поднесоа писмени изјави, дисциплинската комисија на РФМ донесе одлука двата тима да ги казни со идентична парична казна за однесувањето на своите навивачи. Вардар и Е. Пелистер ќе мора да платат по 150.000 денари.
Исто така Вардар заработи и суспензија на теренот и наредните два натпревари на домашен терен ќе ги игра без публика.
