Вардар и Шкендија се издвоија како единствени конкуренти во трката за титулата откако Струга ТЛ потклекна на стартот од пролетта, а денеска на комплексот на ФФМ (14 часот) ќе се одигра големото дерби меѓу овие два тима.
Вардарци во моментот имаат четири бода предност, а Шкендија заврши со европските искушенија и сега комплетно се фокусира на трката за титулата на домашната сцена.
Според квотите, Вардар е умерен фаворит, со оглед дека игра на домашен терен, а го доби и првото меѓусебно дерби оваа сезона во Тетово, со 0-1, со голот од пенал на Давид Бабунски. Вардар во оваа битка влегува по шокантната елиминација во Купот од Охрид и по ремито против Струга ТЛ во шампионатот на гостински терен. Од таборот на „црвено – црните“ велат дека по два меча без триумф, време е Вардар да се врати на победите.
„Денеска е дерби меч кој што може да го одлучи шампионатот. Ние се подготвуваме како и за секој друг натпревар. Дополнителна мотивација нема да биде потребна, дресот на Вардар е сам по себе мотивација за секого. Противникот е анализиран, се знае која е Шкендија. Максимално сме подготвени и фокусирани на нивните јаки но и слаби страни кои што ќе се обидеме да ги искористиме. По два тешки меча, екипата е подготвена да се врати на победничките патеки и да заборави што се случуваше претходно. Денеска како и на секој меч одиме на победа, иако играме против одлична екипа како што е Шкендија“ – изјави еден од најконтантните во тимот на Вардар, Георгије Јанкулов.
Во Битола, од 16 часот се среќаваат Пелистер и Силекс. Домаќинот има грижи за опстанок, додека Силекс се обидува да фати приклучок за излез во Европа.
