Ракометарите на Вардар после убедливата победа на домашен терен над Валур во Лигата на Европа, вечерва во Германија го доживеаја и првиот европски пораз оваа сезона. „Вардарци“ беа далеку од квалитетот на бундеслигашот Мелсунген, кој на крајот се радуваше на убедлива победа од 34-18.
„Црвено-црните“ се што успеаја да направат на овој натпревар е да израмнат на 1-1 на самиот старт од мечот, а од тогаш па се до последниот свиреж на судиите, на теренот доминираше екипата на Мелсунген. Домашните во првото полувреме трипати направија серија од по 4-0, па заслужено на паузата заминаа со водство од 17-10.
Оние 4-0 од финишот на првиот дел, беа надоградени со уште 4-0 на стартот од второто полувреме, па серијата на Мелсунген беше 8-0 за водство од убедливи 21-10. И во продолжение од мечот предноста на домашните растеше се до конечните +16 за Мелсунген.
Младен Крсманиќ со четири гола беше најефикасен кај Вардар, додека Милан Лазаревски и Ашраф Маргели по трипати ја погодија противничката мрежа. Сега за Вардар следува двомеч против Порто, најпрво на домашен терен на 22-ти октомври, а седум дена подоцна и на гостински терен.
