Во февруари минатата година Вардар беше во многу незавидна ситуација. Тимот се бореше да се спаси од испаѓање, а на 16 февруари играше на арената „Тодор Проески“ против Шкендија.
Во дуелот против големиот ривал Вардар беше под голем притисок да брка бодови, но Шкендија славеше со 1:2. Тоа беше последен пат кога вардаровите фудбалери со наведнати глави си заминаа од теренот на еден меч од домашното првенство.
Потоа Вардар почна да реди победи и по некој нерешен резултат, но пораз не доаѓаше во никој случај. На крајот, Црвено-црните минатата сезона не само што се спасија од испаѓање, туку го освоија и Купот на Македонија и обезбедија излез во Европа, а на првенствената табела завршија на петтото место.
И во новата сезона, односно актуелниот шампионат, Вардар доминира. Во 18 одиграни натпревари, најтрофејниот македонски клуб е со 15 победи и само три нерешени резултати, без пораз. Вчера беше победен Работнички со 3:0, а денеска е точно една година како Вардар нема пораз во домашното првенство и во Купот на Македонија.
Според актуелната ситуација на табелата, Вардар има 48 бода, шест повеќе од Шкендија, додека Струга ТЛ е на третото место со 41 бод. Освен во првенството, Вардар атакува и на одбрана на тронот во Купот.
Следниот предизвик за Вардар ќе биде на 21 февруари, кога на домашен терен треба да игра против Башкими.
