Фудбалерите на Вардар го добија скопското дерби против Работнички како гостин со убедливи 0-2, со што дојдоа до значајни три бода во битката за опстанок. Резултатот беше отворен во 36-тата минута со голот на Едиз Спахиу.
Само една минута претходно, Азер Омерагиќ не успеа да реализира пенал. Голот за конечни 0-2 на комплексот на ФФМ беше дело на Мато во 91-вата минута. Вардарци со овие бодови конечно ја напуштија опасната зона и со 20 поени сега се на осмата позиција на табелата, додека Работнички останува на минус пет од лидерот Шкендија.
Токму Шкендија доживеа вистински дебакл и загуби со убедливи 3-0 на гостувањето кај актуелниот шампион на Македонија, Струга. Србинот Сава Радиќ беше двоен стрелец за стружани, додека еден гол беше дело на Марјан Радески.
Најубедливата победа ова коло ја забележа Силекс, кој немаше милост за Беса и славеше со 0-5. Алиќ, Ѓорѓиевски, Хрвановиќ, Маронг и Донов беа стрелци на головите за кратовчани.
Останатите три натпревари завршија со минимални победи на Пелистер над Воска, Гостивар над Брера и на Тиквеш над Шкупи.
