Најтрофејниот македонски фудбалски клуб Вардар немаше никаква шанса во дуелот против украинскиот гигант Динамо Киев на пријателскиот меч одигран во Турција и загуби со 4:0. Динамо уште од самиот старт ја покажа силата и во првите 30 минути даде три погодоци, решавајќи ги сите дилеми околу победникот.
Бујалски во петтата минута и Сидорчук во седмата погодија за брзо водство од 2:0 на Динамо, а веќе во 29-тата минута беше 3:0 за Украинците со погодокот на Дуелунд. Покрај трите погодоци, играчите на Динамо пропуштија уште неколку шанси, но и без таа реализација имаа сигурна предност.
На почетокот на вториот дел, тренерот на Динамо направи комплетна измена на тимот и во игра внесе 11-мина нови играчи, па Вардарци во вториот дел успеваа бидат порамноправен противник, но сепак не успеаја да ја сочуваат мрежата незатресена. Во 87-мата минута, Динамо со голот на Русјин од пенал стигна до победа од 4:0.
Ова беше втор пораз на Вардар на подготовките во Турција откако претходно загуби и во дуелот со Хајдук со 1:3.
