Точно пред 40 години, на втори октомври 1985 година, првпат македонска екипа успеа да мине едно коло во европските фудбалски купови. Вардар на преполниот „Градски стадион“ во Скопје славеше со 1-0 над Динамо Букурешт со голот на Гордан Здравков во 46-тата минута, а тоа беше доволно да се надополни негативата од 2-1 од првиот меч.
Токму овој меч беше повод вардаровите легенди да организираат собир и да се присетат на натпреварот кој се одигра точно пред 40 години. За Вардар на тој натпревар настапија голманот Грошев, потоа Јовановски, Симовски, Канатларовски, Сетинов, Јаневски, Здравков, Урошевиќ, Панчев, Савевски и Рингов, а од клупата за резерви влегоа Најдоски и Горачинов. Таа сезона „црвено-црните“ од клупата беа предводени од Вукашин Вишњевац.
Вардар во следното коло беше елиминиран од шкотскиот Данди јунајтед со гостински пораз од 2-0 и домашно реми, 1-1, а Македонија чекаше цели десет години за некоја наша екипа повторно да мине коло во европските купови. Тоа повторно беше Вардар и тоа летото 1995 година.
Во продолжение неколку фотографии од натпреварот Вардар – Динамо Букурешт.
