Ракометарите на Вардар 1961 запишаа нова убедлива победа во плејофот од Суперлигата, откако во СЦ „Јане Сандански“ го совладаа Бутел Скопје со 26-35. Иако Бутел формално беше домаќин, мечот целосно беше во знакот на Црвено-црните.
Натпреварот започна израмнето, со кратко водство на Бутел, но тоа беше сѐ што момците на тренерот Кузманоски успеаја да направат. Вардар брзо ја презеде контролата, а од резултат 5-5 започна серија која им донесе водство од 5-9. Првото полувреме заврши со предност од четири гола за вардарци (14-18).
Во вториот дел, Бутел накусо се доближи на три гола разлика (15-18), но немаа сили да му се спротивстават на фаворитот. Вардар продолжи со рутинска игра и на моменти имаше и девет голови предност (24-33), што беше и конечниот епилог, победа од 26-35.
Филип Николов од Бутел беше најефикасен со 12 погодоци, додека Ашраф Маргели постигна девет гола за Вардар. Стефан Петриќ запиша седум погодоци.
