Вардар е еден од неколкуте клубови во цела Европа кои немаат ниту еден пораз во домашното првенство. За добри резултати секогаш еден од најважните елементи во тимот е одбраната. Црвени-црните од пред неколку дена, во дефанзивниот ред се засилија со репрезентативецот Дарко Велковски.
„Во моментов Вардар мене ми помогна, а јас ќе му помогнам и на Вардар сигурен сум во тоа. Во последни година и пол не бев како што треба, доста мечеви имав пропуштено и се надевам тука ќе го фатам ритамот. Колку можам ќе придонесам. Имаме добра екипа за македонскиот шампионат, ако сме како што треба знам дека ќе ја освоиме титулата“, вели Велковски пред денешниот тренинг во вардаровата база во Хиподром.
Велковски го носеше дресот на Вардар од 2015 до 2018 година и многу добро знае како е да се освојуваат трофеи со овој клуб.
„Повеќето играчи ги познавам, неколку странци не ги познавам, а од македонските играчи запознаен сум со нив. Ми треба неколку дена да се спремам, па ќе видиме што ќе биде понатаму. Се надевам на голема минутажа, а целта до крајот на оваа сезона се знае, прво место и Куп-титула, потоа и настап во Европа“, додаде Велковски, кој треба да е дел од столбот во одбраната заедно со Мислав Матиќ, кој е вистински командант во дефанзивата во последните година дена.
