Интер го победи Ливерпул на „Енфилд роуд“ со 1:0, но на крајот англискиот тим се радуваше на пласман во четвртфиналето од Лигата на шампионите. Ливерпул останува во елитата благодарение на победата во првиот меч во Милано со 2:0.
Италијанскиот првак поведе во Ливерпул со голот на Лаутаро Мартинес, но само една минута подоцна, црвен картон доби Алексис Санчес. Чилеанецот мораше да ја напушти играта поради два жолти картони. Вториот картон Санчес го доби по стартот над Фабињо, а некогашниот стратег на Арсенал, Арсен Венгер, вели дека играчот на Ливерпул одглумил.
„Тенка е линијата меѓу тоа да мамиш и да бидеш паметен. Фабињо во овој случај мамеше. Тука имаше контакт, но не може да се тврди дека имаше фаул. Ако веднаш станеше, реакцијата на судијата ќе беше поинаква. Кога судијата го покажа црвениот картон, Фабињо веднаш стана. Алексис прво ја удри топката и немаше никаква намера да го повреди. Сепак, Фабињо тоа го искористи и доста добро одглуми. Откако беше покажан картонот, фудбалерот стана како ништо да не било“, анализира Венгер.
