Специјалната олимпијада на Македoнија (СОМ) е невладина организација која ги сервисира потребите на лицата со пречки во развојот со цел нивна социјализација и интеграција во заедницата преку спорт и рекреација. Формирана е во 2003 година, а од оваа година меѓу помагателите е и Sport Life како општествено одговорна компанија.
Под мотото „Дозволи ми да победам, а ако не можам, дозволи ми да бидам храбар во обидот“ организацијата во земјата ја остварува својата мисија, а тоа е да овозможи спортски натпревари и тренинзи во различни олимписки спортови за деца и возрасни со интелектуална попреченост, давајќи им постојани можности да ја развијат физичката кондиција, да покажат храброст, да искусат радост и да учествуваат во споделување на вештини, знаења и пријателства со нивните семејства и останатите атлети на Специјална олимпијада и заедницата.
Синоќа во пријатниот новогодишен амбиент на спортскиот клуб МТП се одржа новогодишна забава на која атлетите се забавуваа, добија подароци, а претседателката на СОМ, Моника Бошкоска, потсети на сите успеси годинава и додели плакети во знак на благодарност до неколку компании, меѓу кои и Sport Life.
Во својот годишен план Специјалната олимпијада на Македонија организира Европска кошаркарска недела, пливачки митинг и Фудбалска недела поддржана од ФИФА. Специјалната олимпијада на Македонија во изминативе години постигна врвни резултати со учеството на повеќе меѓународни турнири и Олимписки игри во поединечни и групни спортови.
Следна дестинација на нашите атлети се Зимските олимписки игри во Торино 2025, каде што нашите олимпијци уште еднаш ќе се обидат успешно да ја претставуваат својата земја.
