Репрезентацијата на Бразил на свој терен во Сао Пауло минимално со 1:0 славеше над Парагвај и на тој начин си го обезбеди местото на завршицата на Светското првенство кое ќе се игра следната година во САД, Канада и Мексико.
Винисиус јуниор беше стрелец на единственот гол, и тоа пред крајот на првото полувреме. Со оваа победа Бразил стигна до 25 бодa од 16 кола и тоа е сосема доволно на две кола до крајот од квалификациите Кариоките да го прослават обезбедувањето мундијалска виза.
Овој меч е посебен и за новиот селектор на Бразил, Карло Анчелоти, кој по вторпат го водеше националниот состав на петкратниот светски првак и стигна до првата победа.
Освен Бразил, место на Светско првенство обезбеди и Еквадор, иако играше нерешено без голови на гости кај отпишаниот Перу. Еквадор, исто како Бразил, има 25 бода и тоа е доволно да биде релаксиран во последните две кола од квалификациите.
Голема работа заврши и Уругвај, кој со 2:0 ја победи Венецуела. Во двете полувремиња домашните фудбалери постигнаа по еден гол и сега имаат 24 бода, шест повеќе од Венецуела, која е на седмото место, кое води во баражот за пласман на СП.
Актуелниот светски првак Аргентина, која претходно имаше обезбедено место на СП, на свој терен одигра нерешено 1:1 против Колумбија. Луис Дијас погоди за водство на Колумбија во 24-тата минута, а Гаучосите се спасија од пораз со погодокот во 81-вата минута, кога погоди Алмада. Интересно е дека Аргентина од 70-тата минута беше и со играч помалку по исклучувањето на Енцо Фернандес.
