Поранешниот португалски првак, Боависта, ги доживува најтешките моменти во својата 123-годишна историја.
Боависта во минатата сезона испадна од прва лига, но не им е дозволено да играат во втора, трета, четврта, петта, шеста, ниту во седма, туку клубот беше исфрлен во аматерски ранг и сега му се заканува целосно затворање. Судот донесе одлука според која Боависта мора да плати 55.000 евра на Даночната управа до крајот на следната недела, а доколку не го стори тоа, клубот ќе биде трајно затворен.
Соочени со катастрофа, навивачите решија да ги земат работите во свои раце. Клубот од Порто започна јавна кампања за собирање средства наречена „Боависта, секогаш!“, а одѕивот беше добар. Сепак, клучното прашање е дали потребната сума ќе биде собрана во дадениот рок?
Ова не е прв пат Боависта да се соочи со големи проблеми. Пред неколку години, таа беше исклучена и од португалската елита, но преку судските процеси се врати во друштвото на најдобрите. Сегашната ситуација изгледа тешка.
А, во 2001 година, Боависта сензационално ја освои титулата шампион на Португалија, станувајќи само вториот клуб, заедно со Белененсес, кој ја прекинал доминацијата на „големата тројка“ – Порто, Бенфика и Спортинг.
Клубот играл и во Лигата на шампионите, а нивниот дом е еден од најубавите стадиони во Португалија, „Естадио до Беса“, каде што се играле и натпреварите од ЕП 2004. Во витрините на клубот има и пет трофеи од Купот на Португалија и три Суперкупа.
Познат по своите црно-бели карирани дресови, Боависта отсекогаш била препознатлива меѓу фудбалските фанови. Иднината на клубот е мрачна: ако успеат да ги решат сите финансиски пречки, тимот ќе мора да почне од дното на португалската фудбалска пирамида. Во спротивно, клубот дефинитивно ќе биде затворен.
„Не станува збор само за фудбал. Станува збор за спасување на жив споменик, клуб изграден тула по тула од заедницата. Боависта е подготвена повторно да се издигне, како клуб за сите. Предизвикот е огромен. Патот е тежок. Но, ако клубот преживеал диктатура, испаѓање и предавство, ќе го преживее и ова. Бидејќи Фудбалскиот клуб Боависта не е само бизнис. Не е само лого. Не е само биланс на состојба. Тоа е кауза. А, каузите никогаш не умираат“, стои на веб сајтот на Боависта.
