Фудбалските првенства во најголем дел од европските земји се при крај, речиси секаде може да се насетат шампионите за оваа сезона, но во англиската Премиер лига и српската Суперлига неизвесноста може да потрае до последното коло.
Во Англија и во Србија се води мртва трка за првото место и лидерите Манчестер сити, односно Црвена ѕвезда се под голем притисок од конкурентите. Секој евентуален пораз, па дури и нерешено, може да значи губење на титулата. Ниту Ливерпул, кој е втор во Англија, ниту Партизан како предизвикувач во Србија, исто така не смеат да потклекнат и да одиграат нерешено или да загубат.
Во Премиер лигата, која е веројатно најсилна на светот, останаа уште шест кола. Сити му бега на Ливерпул само еден бод.
„Пред нас е клучен месец. Не сме глупави, ако барем еднаш до крајот на сезонава одиграме нерешено, Ливерпул ќе биде шампион. Играчите знаат дека мора да играме како против Брајтон и да ги добиеме сите натпревари“, изјави Пеп Гвардиола.
Во српската Суперлига, Ѕвезда има два бода плус во однос на Партизан и пет кола до крајот во кои чудо би било ако Црвено-белите му го препуштат првото место на вечниот ривал, но никогаш не се знае, тензиите остануваат присутни до крај.
