Само уште по една пречка им стои на патот на најголемите аргентински ривали Ривер плејт и Бока јуниорс до нова меѓусебна пресметка во Копа Либертадорес, овојпат во потенцијалното полуфинале.
Лани лутите ривали се сретнаа во големото финале, а годинава тоа не е можно и за еден од овие клубови од Буенос Аирес нема да има место во финалето на јужноамериканската верзија на Лигата на шампионите.
Во четврт-финалето Бока треба да игра со Кито. Еквадорскиот тим нема да биде лесен противник бидејќи Де Роси и другарите ќе треба да гостуваат во град кој е на огромна надморска височина и ќе им треба многу кислород за да го преживеат тој дуел. Ривер, кој е бранител на трофејот, во четврт-финалето ќе се соочи со Серо Портењо од Парагвај.
Првото наредно Суперкласико е закажано за 1 септември, но тоа е лигашки меч. Доколку би играле едни со други во полуфиналето на Либертадорес, тие спектакли би се случувале на 2 и 23 октомври, прво на „Монументал“, па реваншот на „Ла Бомбонера“.
