Главниот град на Германија, Берлин, е еден од градовите домаќини на Европското првенство во ракомет кое е во тек, но тука нема некоја еуфорија или возбуда поради тоа. Речиси и да не може да се најдат плакати или други сигнали кои укажуваат дека во Берлин деновиве се играат мечеви од две групи на ракометното ЕП.
Ниту во трговскиот центар кој е веднаш до салата и каде е центарот за акредитирање, нема други знаци дека во Берлин има ракометно ЕП.
Тешко дека на улица или во јавниот превоз во овој велеград ќе сретнете некој што зборува за ракомет. Некои знаат дека има ЕП, повеќето не знаат. „Мерцедес Бенз арената“ утревечер од 20 часот на мечот Македонија – Германија сигурно ќе биде преполна, не е проблем од толку голем град да се најдат 14.000 навивачи кои ќе дојдат, а секако на трибините ќе бидат и македонските фанови кои пропатуваа долг пат за да ја бодрат Македонија и само среќниците дојдоа до билети.
Во Берлин ќе се играат само мечеви од групната фаза, втората фаза е во Хамбург и Келн, а самата завршница во Келн, кој е познат и како град во кој редовно се игра и завршниот Фајнал-фор на Лигата на шампионите во ракомет. Во Келн сигурно ќе биде повозбудливо и еуфоријата поголема, тогаш ќе се решава и кој ќе биде првак.
Сигурно е дека во Берлин многу поинаку ќе биде во јуни и јули, кога во Германија ќе се игра ЕП во фудбал. Финалето на ЕП ќе се игра токму во Берлин, фудбалот е спорт број 1 во Германија и тој настан сигурно и маркетиншки и медиумски ќе биде далеку подобро покриен и повеќе берлинци ќе знаат дека во нивниот град се случува нешто интересно од спортска гледна точка.
