Извршниот директор на Манчестер јунајтед, Омар Берада, продолжува да верува во успешното спроведување на т.н. „Проект 150“, според кој машките и женските тимови на клубот треба да ги освојат шампионските титули во 2028 година, кога Јунајтед ќе ја прослави 150-годишнината од своето основање.
Берада го презентираше планот во септември минатата година, но потоа тимот на Рубен Аморим ја забележа најлошата сезона од 1973/74 година, кога испаднаа од елитата. Во женската лига, се чини дека е многу тешка задача да се симне од тронот тимот на Челзи, кој ја освои тројната круна, а остана непоразен цела сезона.
„Станува збор за поставување низа цели во рамките на одредена временска рамка, за да можеме да ги фокусираме нашите напори и енергија на таа голема цел. Може ли тимот да ја освои титулата во Премиер лигата во 2028 година? Секако. Да, штотуку завршивме на 15-то место и тоа изгледа како невозможна задача, но зошто да не се обидеме да ја оствариме? Зошто да не направиме сè што можеме? Цврсто верувам дека можеме да го направиме тоа. Имаме два или три летни рокови за да изградиме тим кој може да почне да се бори за освојување на Премиер лигата. Никој не вели дека не сакаме да ја освоиме титулата пред тоа. Си поставуваме цел со специфична временска рамка кон која треба да се стремиме“, рече Берада.
Директорот, исто така, ја спореди ситуацијата на Рубен Аморим со онаа на Пеп Гвардиола по неговата прва година во Манчестер сити: „За Пеп, првата година беше тешка. Тој не освои ништо и имаше сомнежи дали може да ја наметне својата фудбалска визија во Премиер лигата. Луѓето велеа дека е арогантен и дека нема да го промени својот стил на игра. Но, тој се држеше до своите принципи. Нема да биде лесно. Ништо нема да се реши во еден летен прозорец, но ние сме на вистинскиот пат. Најлошиот дел од оваа фаза на трансформација го оставивме зад нас. Сега ќе почнеме да градиме. Уверен сум дека ќе се вратиме на врвот“, вели првиот човек на 20-кратниот англиски првак.
