Грчкиот првак Олимпијакос доживеа бродолом и е елиминиран во квалификациите за Лигата на шампионите со тежок пораз од 0:4 од Макаби Хаифа, и тоа на домашен терен, откако реваншот вчеравечер го почна со добар резултат 1:1 од првиот меч.
Се бара оставка од тренерот Педро Мартинс, но тој само го зголеми гневот кај Грците кои навиваат за Олимпијакос.
„Нема шанси да поднесам оставка. Тој збор не постои во мојот свет, во мојот речник. Никогаш не сум се предавал во животот и нема да го сторам тоа ниту сега во Олимпијакос“, изјави Португалецот.
Олимпијакос е редовен учесник во фазата по групи во Лигата на шампионите, но сега рано се сопна во еден од најтешките порази на европска сцена во историјата на клубот.
„Се чувствувам способен и силен да ги прегрмиме овие тешки моменти за клубот. Верувам во играчите и во себе, иако ова е ситуација што можеби не му се случила никогаш на Олимпијакос“, додаде Мартинс.
Португалецот се надева дека ќе ја почне новата сезона во Грција на кормилото на гигантот, но постои голема веројатност и да биде сменет.
