Фудбалската репрезентација на Македонија на денешната ждрепка од 12 часот ќе ги дознае своите противници во квалификациците за Светското првенство 2026, а нашата земја не е меѓу оние кои имаат одредено рестрикции и не смее да играат против некого од политички или географски причини.
Забрането е иста група да бидат Белорусија со Украина, Шпанија со Гибралтар, и Косово со Србија или со Босна и Херцеговина. Не смее да се сретнат ни Ерменија со Азербејџан, но тие се во ист шешир, па не е ни можно да бидат во истата група.
Има и географски рестрикции поради големата оддалеченост на некои земји. Така, Азербејџан може да биде во група само со еден од Гибралтар, Исланд или Португалија, Исланд не може да биде и со Ерменија и со Кипар, а Казахстан може да биде во група само со еден од Андора, Англија, Франција, Гибралтар, Исланд, Малта, Северна Ирска, Португалија, Република Ирска, Шкотска, Шпанија или Велс.
Естонија, Фарски острови, Финска, Исланд, Летонија, Литванија и Норвешка, се означени како „ризични“ поради голем студ, најмногу две од нив може да бидат во иста група, а Фарски и Исланд не може да бидат во иста група и не може да играат дома во март или ноември.
Македонската репрезентација денеска може и да не ги дознае имињата на сите ривали со кои би играла. Ова е затоа што во март се играат четвртфиналиња од елитната Лига на нации, па три од поразените тимови во тие дуели, ќе играат во група со пет тима во каква што ќе се најде и Македонија.
