Голем скандал предизвикал организаторот на Европското ракометно првенство на вчерашниот натпревар помеѓу Германија и Македонија откако обезбедувањето на влезот во салата во Берлин детално ги проверувало македонските навивачи и им ги одземало сите реквизити на кои го имало Македонскиот национален симбол со 16-краката ѕвездата од Кутлеш.
Голем број навивачи синоќа реагираа за ова на социјалните мрежи, а еден од најверните, кој секаде ја следи Македонија, Наце Митев, испрати порака до Германците: „Немате толку обезбедување, колку што ние имаме знамиња“.
Поранешното знаме на Македонија, но и симбол на сите Македонци во светот, е неизоставен дел од сите големи спортски натпреварувања каде што настапува Македонија, симбол кој ги обединува сите македонски навивачи, и навистина е несфатлив потегот на домаќинот да го забрани неговото истакнување на трибините во Берлин. Сепак, Македонците на различни начини се снаоѓаа и успеваа да го внесат на трибините, кои блеснаа со голем број на знамиња со 16-кракото сонце од Кутлеш.
Навивачите на ракометната репрезентација на Македонија дури и ги фотографирале одземените знамиња на влезот во „Мерцедес бенц арената“.
