Напаѓачот Николо Ѕаниоло нема иднина во Галатасарај, и покрај договорот кој му важи до јуни 2027 година. Италијанецот разгледува понуди од Удинезе, Фламенго, Бенфика и ПСВ Ајндховен.
На 26-годишна возраст, Ѕаниоло се соочува со тешкотии да го покаже својот потенцијал. Проблемите започнаа со заминувањето од Рома и преселбата во Галатасарај во февруари 2023 година за 15 милиони евра.
Таму остана само шест месеци, а потоа имаше неуспешни позајмици во Астон Вила, Аталанта и Фиорентина, без некој од клубовите да го задржи перманентно.
Според „Газета дело Спорт“, Удинезе му нуди враќање во Серија А преку позајмица со опција за откуп, каде би го заменил Флоријан Тован, кој замина во Ленс.
Покрај Удинезе, интерес покажуваат и Фламенго, Бенфика и ПСВ, но Ѕаниоло смета дека враќањето во Италија му дава најдобра шанса за враќање во репрезентацијата под водство на новиот селектор Џенаро Гатузо.
