Жоао Марио се пријави како единствен сведок што ја слушнал конверзацијата меѓу Кристијано Роналдо и Бруно Фернандеш, што предизвика бура од коментари поради ладниот однос на соиграчите од Манчестер јунајтед.
Бруно едвај и да му пружи рака на Кристијано за да се поздрават на првата средба во португалската репрезентација пред заминувањето на Мундијалот во Катар.
Жоао Марио посочи дека бил блиску и го чул разговорот на двете големи ѕвезди на Португалија.
„Бруно пристигна последен во соблекувалната и Роналдо го праша да не патуваше со брод. Тоа е нивна интерна шега, па тие се соиграчи во Манчестер јунајтед и во нашата репрезентација. Да, ги видов фотографиите, но не верувам дека е нешто сериозно“, изјави Марио.
Тој и Роналдо беа во составот на репрезентацијата на Португалија што стана европски првак во 2016 година.
Сега Португалците кои во завршниот бараж-меч за СП ја елиминираа Македонија се надеваат на светска круна, но односот меѓу Роналдо и Фернандеш ги разочара португалските навивачи и стана хит на социјалните мрежи.
Роналдо претходно жестоко го критикуваше Манчестер јунајтед во интервју со Пирс Морган, што е најава за заминување од клубот, а очигледно критиките на Кристијано не му легнаа најдобро на Фернандеш.
Португалија во првата фаза на Светското првенство ќе игра против Гана, Уругвај и Јужна Кореа.
