Голем број на промени ќе има во составот на Реал Мадрид на вечерашниот дуел со Осасуна во однос на тимот кој ја надигра Севилја. Некои од измените се принудни поради повреда, други се намерни, со цел да се одморат за пресметката со Атлетико Мадрид, до кога во Реал очекуваат да им се вратат некои од повредените.
Иако е еден од најдобрите поединци во тимот сезонава, Герет Бејл нема да игра против Осасуна и добива одмор за да биде посвеж за гостувањето кај Атлетико. Повредени се Менди, Марсело, Иско и Модриќ, а на списокот од 19 кандидати за настап вечерва го има младиот Бразилец Родриго, кој можеби првпат ќе добие шанса да заигра на официјален меч за Реал.
Можно е во почетниот тим да се најде Лука Јовиќ со цел да се одмори првиот стрелец Карим Бензема, а и во одбраната би можело да игра Милитао, а Варан или Рамос да бидат на клупата. Дали сите овие ротации ќе бидат искористени од Осасуна, која има четири нерешени игри во првите пет кола, останува да се види.
