Челниците на германскиот првак Баерн Минхен имале контакт со францускиот стратег Зинедин Зидан за евентуално негово доаѓање на клупата на најтрофејниот клуб во Германија. Баерн веќе има седум бода зад лидерот Борусија Дортмунд и тоа е знак дека е можна промена на клупата, каде што е Нико Ковач.
Освен Баерн Минхен, за Зидан се интересираат и Манчестер јунајтед и Пари Сен Жермен. Ова го открива шпанскиот новинар Едуардо Инда.
„Зидан има две сериозни понуди, и тоа од Манчестер јунајтед и од ПСЖ. Трет на таа листа сега е и Баерн Минхен“, е коментарот на шпанскиот фудбалски експерт.
Зидан летоска си замина од Реал Мадрид и најави дека ќе бара нов предизвик, но засега францускиот стратег молчи за тоа кој би бил клубот во кој би работел.
