Германскиот тенисер Александер Зверев со победа го започна настапот на завршниот Мастерс турнир во Торино.
Во првото коло од групата Б, Зверев го совлада Американецот Бен Шелтон со 2-0 во сетови (6-3, 7-6), по еден час и 53 минути игра.
Третиот тенисер на светската ранг-листа целосно доминираше во првиот сет, двапати му го одзеде сервисот на противникот и рутински поведе со 6-3.
Во вториот сет натпреварот доби многу поизрамнет тек. Шелтон значително го подобри својот сервис, успешно ги освојуваше своите гемови, а Зверев го следеше неговиот ритам, па сетот заврши во тај-брејк.
Таму Американецот стигна до три последователни сет-топки и изгледаше блиску до израмнување, но Зверев покажа голема смиреност, освои пет поени по ред и го затвори мечот во своја корист.
Во вториот натпревар од оваа група, кој ќе се одигра утре, првиот светски рекет Јаник Синер ќе се соочи со Канаѓанецот Феликс Оже-Алијасим.
