Во изминативе неколку години се навикнавме да го гледаме Голден Стејт како победува во серија. Сепак, сезонава Воините се далеку од шампионскиот ритам. Откако останаа без клучните играчи кои се повредија и отсуствуваат подолг период, Голден Стејт се најде на дното на Западната конфедерација.
Воините го имаа најслабиот биланс со само пет победи и 24 порази, но клубот кој беше шампион во 2015, 2017 и 2018 година, полека како да се буди. Голден Стејт нареди четири победи по ред, последната против Феникс санс со 105:96. Интересно е што во првите три четвртини, гостите доминираа и ги добиваа со по четири поени предност, па Сонцата во последните 12 минути влегоа со позитива од 12 разлика.
Сепак, Голден Стејт во решавачката четвртина одигра феноменално и ја доби со 39:18, за сигурна победа на крајот. За Феникс ова беше осми пораз во низа.
Тимот со најдобар биланс, Милвоки бакс немаше никакви проблеми на гостувањето кај Атланта и победи со 112:86. Уште во првото полувреме гостите поведоа со 23 поени разлика (63:40) и беше јасно кој ќе биде победникот.
Во останатите мечеви кои се играа ноќеска во НБА: Шарлот – Оклахома 102:104 по продолжение, Орландо – Филаделфија 98:97 и Мајами – Индијана 113:112.
