Филип Кузмановски со гол во последните секунди го спаси Еурофарм Работник од пораз во дербито со битолскиот ривал Пелистер.
По многу возбудувања, мечот заврши нерешено, 24:24. Стефан Дрогришки во финишот постигна три гола во серија за Пелистер, екипата која игра како преродена откако кормилото го презеде Јошко Петковиќ. И кога беа на прагот на победа, „зелено-белите“ ги испуштија трите бодови, а Кузмановски ги казни со израмнувачки гол.
По првиот дел, Еурофарм, кој вечерва ја имаше улогата на гостин, имаше предност од 10:9, а Пелистер имаше предност од еден гол во самиот финиш, но не успеа да победи.
Еурофарм ја прекина серијата од девет победи и ова е прво реми, но сепак го задржа првото место во Суперлигата со 28 бодови. Пелистер има 19 бодови на петтата позиција.
